ఇప్పుడు అన్ని ఎలక్ట్రానిక్‌ పరికరాలను రిమోట్‌ పద్ధతిలో నియంత్రించటం సర్వసాధారణమైన విషయంగా మారింది. వీటిని నియంత్రించే ఈ రిమోట్‌ కంట్రోలర్‌లన్నీ బ్యాటరీలు ఆధారంగా పనిచేసేవే.
ఇప్పుడు ఛార్జింగ్‌ బ్యాటరీలు అందుబాటులోకి వచ్చాయి కాబట్టి పూర్తిగా ఛార్జ్‌ చేసిన బ్యాటరీలను ఉపయోగిస్తే మహా అయితే వారం పాటు ఉపయోగించుకోవచ్చు. తిరిగి బ్యాటరీలను రీ-ఛార్జ్‌ చేసుకోవాల్సిందే. ఈ బెడద నుండి తప్పించుకునేందుకు వీలుగా గిజూ సంస్థ యూనివర్శల్‌ రిమోట్‌ కంట్రోల్‌ను ప్రవేశపెట్టింది. ఇది బ్యాటరీలు లేకుండానే పనిచేయటం విశేషం. పైగా ఇది మల్టీ బ్రాండ్‌ (శాంసంగ్‌, సోనీ, ఫిలిప్స్‌, పానాసోనిక్‌ తదితర) పరికరాలన్నింటినీ నియంత్రించగలదు. ఈ రిమోట్‌ కంట్రోల్‌కు బ్యాటరీలను వినియోగించటానికి బదులుగా దానిపై వుండే డయల్‌ను 30సార్లు తిప్పితే చాలు. ఇది పూర్తి స్థాయిలో ఛార్జింగ్‌ అయిపోతుంది. పూర్తిగా ఛార్జ్‌ అయితే అది మరో వారం పాటు పనిచేస్తుందన్న మాట.
ఇంటర్నెట్‌.... ఇంటర్నెట్‌.... ఇంటర్నెట్‌.... ఈరోజు ఈ పదం వినపడని క్షణం వుండదంటే ఆశ్చర్యపడవలసిన పనిలేదు. ఇంటర్నెట్‌ వాడకం అంతగా పెరిగిపోయింది. బ్యాంక్‌ ఖాతాలు, బిల్లులు, రిజర్వేషన్లు ఇలా చెప్పుకొంటూపోతే లెక్కకు మిక్కిలి పనులన్నీ ఈరోజు ఆన్‌లైన్‌లోనే జరిగిపోతున్నాయి. మరి వీటి వాడకానికి వెనుక వున్న కథను కూడా తెలుసుకుందాం. ఇంటర్నెట్‌ వాడాలంటే దానికి కూడా ఒక ఒక అప్లికేషన్‌ కావాలి గదా! ఈరోజు అన్నీ పనులను కాలు కదపకుండా చక్కాచక్కా చేసుకుపోతున్నామంటే వీటిని ఆపరేట్‌ చేయడానికి బ్రౌజర్లను కనుగొన్న వారికి నిజంగానే ధన్యవాదాలు చెప్పాలి. గతంలో కంప్యూటర్‌ గురించి, ఇంటర్నెట్‌ గురించి బాగా అవగాహన వున్నవారు మినహా సామాన్యులు దీన్ని వినియోగించుకోలేకపోయేవారు. అంటువంటి రోజుల నుండి ఈరోజు చిన్న పిల్లలు కూడా ఆపరేట్‌ చేయగల స్థాయికి వచ్చింది.
